Pawos 68

Juru Arah sakadi inucap sajeroning Pawos 49 aksara ka miwah Pawos 67 angka (1) inggih punika Krama Adat lan Banjar Adat Tamanbali sané maswadharma ngamargiang arah sakasidan nyané manut pituduh Bendesa Adat lan Klian Banjar Adat Tamanbali.

Sinoman Sasihan inggih punika Krama Desa Adat Tamanbali, sané ngamargiang lilitan manut bacakan Krama adat.

Sinoman Sasihan utawi Juru Arah tan keni bacakan dedosan.

Swadharmaning Sinoman Sasihan utawi Juru Arah:

1. ngamargiang arah-arahan melarapan titah Bendesa Adat lan Klian Banjar Adat;
2. ngamedalang cané nepék Pasangkepan Banjar Adat ritat kala pacang matimbang lilitan manut bacakan.

Ayah-ayahan swadharma Sinoman Sasihan sakadi inucap angka (4) kadadosang kaayahang olih kakuwuban/pangroban nyané sané sampun antes.

Arah-arahan sakadi inucap angka (4) aksara ha wantah patut karauhang majeng sang sané sampun antes ngamargiang ayah-ayah Krama saking kakuwuban utawi pangroban nyané.

Tata cara ngamargiang arah-arahan sakadi inucap ring angka (4) aksara

1. matetengeran antuk ucap pangastungkara “OM Swastyastu”;
2. risampun kasaur, nyantenang raga lantur ngrauhang arah-arahan;
3. pradé nénten polih pasaur sang adruwé paumahan, sané sampun antes ngamarginin ayah--ayahan Krama, sang Sinoman Sasihan patut ngwalinin mapangarah.